اتيكت التليفون

مين فينا مابيتكلمش فى التليفون كل يوم. سواء موبايل او تليفون ارضى. طبعا كلنا بس اللى انا عرفته ان التليفون ليه حاجة اسمها اتيكيت.. اه والله زى الاتيكيت بتاع الاكل كده. أنا بقى نويت اكسب فيكم ثواب كبييير واقولهولكم وانتوا قولولى رأيكم..... اتفقنا؟
خبراء الاتيكيت بيقولوا ان اى حد بيتكلم فى التليفون بيرسم فى خياله صورة للى بيكلمه علشان كده وانت بتتكلم لازم تحط ده فى دماغك خصوصا لو بتكلمه لاول مرة. ولو كنت انت اللى طالب لازم الاول تتأكد من الرقم اللى انت طلبته وبعدين تقول اسمك وبعدين تطلب الشخص اللى انت هتكلمه(كلنا بنعمل كده تقريبا) بيقولوا كمان انك ماتردش على الطرف التانى فى المكالمة باستهانة واستهزاء لازم يكون الرد واضح ومهذب(وبرده كلنا بنعمل كده) بيقولوا كمان بلاش تبدأ الحوار بكلمة نعم او ايوة. لازم تنسى الكلمتين دول من القاموس بتاعك. ولازم يكون صوتك وانت بتتكلم مليان حيوية حتى لو انت مكتئب وحالتك حالة لازم تكون مرح (أمال يعنى متصل بالناس تجبلهم اكتئاب).ولو فى حد طلبك فى التليفون رد على التليفون بسرعة وتسيب اللى فى ايدك وتهتم بيه حتى لو كان معاك ناس او عازم حد فى بيتك (مش كفاية انه عبرك واتصل بيك) وطبعا لازم تاخد بالك من الناس القاعدين جنبك علشان ممكن صوتهم يكون عالى فيزعجوا اللى اتصل بيك يعنى ممكن تقوم من جنبهم (أو تطردهم) ولازم صوتك يكون مسموع عند اللى انت بتكلمه. بس ماتعليش صوتك قوى علشان طبلة ودانه... ولو الخط قطع اتصل بيه تانى .ايوة لازم تتصل تانى ماهو اكيد انت اللى قفلت السكة فى وشه... واخر ملاحظة وانت بتتكلم ماتتحركش كتير علشان ده بيأثر على نبرة صوتك.
ده بالنسبة للتيفون العادى اما الموبايل ده ليه اتيكيت تانى خالص...بيقولوا بلاش تستخدم تليفونك المحمول قدام الناس ولو كنت فى محطة الاتوبيس او المطار ابعد عن الزحمة قدر الامكان حتى لو الاتوبيس هيفوتك او الطيارة هتطلع مش مهم. المهم ماتزعجش الناس اللى واقفة كفاية انهم منتظرين فى الزحمة .كده
وياريت لما تكون راكب ميكروباص ماتفضلش تشغل النغمات وتفضل تسمع فيها. انت مش اول واحد يشترى موبايل بلاش صداع.
انا علشان اريح نفسى من الكلام ده بطلت ارد على التليفون أو اتصل بأى حد وعلشان ارتاح اكترقررت أبيع الموبايل لو حد عايز يشتريه يعنى.